Lëtzebuergesch
Franséisch
Mylittlebigstep
FAQ
-
Wat ass de Studienniveau, ab deem ee fir e Poste bei der Spuerkeess a Fro kënnt?
D’Spuerkeess stellt op all Niveau an, dat heescht souwuel Kandidate mat ofgeschlossener Première oder Treizième, wéi och Kandidate mat engem Bachelor- oder Master-Niveau.
-
Muss ech en Diplom an de Beräicher Finanzen oder Wirtschaft hunn, fir eng Chance ze hunn?
Am Prinzip kucke mir eis all Kandidaturen un. Mais mir privilégiéieren natierlech Diplomer am Finanz-, Wirtschafts- an Droitberäich. Dat gëlt och fir d’Diplomer vu BAC, Bachelor oder Master. D’Spuerkeess offréiert eng Verschiddenheet vu Beruffer an alle Banken- a Finanzberäicher.
Selbstverständlech ginn och déi aner Diplomer berücksichtegt. Zum Beispill ginn d’Informatiksdiplomer opmierksam studéiert, wa se a Fro kommen, fir Plazen an eisen Informatikservicer ze besetzen.
-
Ech hunn en auslänneschen Diplom, akzeptéiert d’Spuerkeess dësen Diplom ouni Weideres?
All auslänneschen Diplom muss am Titelregëster (registre des titres) ageschriwwe sinn. Fir Ären Diplom unerkennen ze loossen, klickt op de Link fir op d’Internetsäit vum CEDIES.
-
Stellt d’Spuerkeess iwwert de Staatsexamen an?
Neen, Dir musst net iwwert de Staatsexamen an d’Spuerkeess erakommen. Als autonoomt Etablissement huet d’Spuerkeess hir eegen Astellungsprozedur. D’oppe Plaze ginn iwwert dës Internetsäit verëffentlecht.
-
Muss ech Lëtzebuergesch schwätzen, wann ech bei der Spuerkeess schaffe wëll?
Mir sinn eng Bank, déi iwwert e grousst Agencen-Netzwierk verfüügt. Dohir ass et immens wichteg, fir d’lëtzebuergesch Sprooch schwätzen ze kënnen. Dat gëlt ganz besonnesch fir déi Plazen, déi direkt am Kontakt mam Client sinn. Fir d’Analyse-, Back-office- oder méi technesch Beruffer ass d’Schwätze vun der Landessprooch net esou wichteg. Mais d’Ëmgankssprooch bei der Spuerkeess ass Lëtzebuergesch.
-
Muss ech déi lëtzebuergesch Nationalitéit hunn, fir bei der Spuerkeess schaffen ze kënnen?
Neen, iwwerhaapt net. D’Spuerkeess ass oppe fir all Nationalitéit. D’Diversitéit ass eng vun den Haapt-Kennzeeche vun hirer Personalpolitik.
-
Wéi soll ech der Spuerkeess meng Demande zoukomme loossen, iwwert d’Post oder um elektronesche Wee?
Et läit eis um Häerzen, fir Iech d’Ofgi vun Ärer Demande esou einfach wéi méiglech ze gestalten. Mir recommandéieren Iech, Är Demande online eranzeginn. Dofir luede mir Iech an, eis Rubrik MyApplication op dëser Internetsäit unzekucken. Wann Dir Är Demande online stellt, kënnt Dir och de Verlaf vun Ärer Demande bei eis verfollegen.
-
Wat soll a menger Demande stoen, fir datt se vollstänneg ass?
Fir den Ufank ginn eng Demande an Ären Online-CV duer. D’Kopië vun den Diplomer sinn net onbedéngt erfuerderlech, wann Dir Iech bei eis mellt. Méi spéit an der Astellungsprozedur gitt Dir si awer gefrot.
-
Wéi kann ech wëssen, datt meng Demande ukoum?
Dir kritt en „accusé de réception“, esou bal wéi Är Kontaktdaten an eiser Datebank gespeichert goufen. All Moment hutt Dir d’Méiglechkeet, fir de Verlaf vun Ärer Demande an der Rubrik „Myapplication“ ze verfollegen.
-
Wéi laang dauert den Astellungsprozess vun deem Moment un, wou ech meng Demande stellen?
D’Entscheedungsdauer hänkt vu verschiddene Facteuren of: de Profil, dee gesicht gëtt, d’Unzuel vun Demanden, déi ageschéckt goufen, d’Unzuel vu Kandidaten, déi eise Critèren entspriechen, d’Unzuel vu Gespréicher asw.
Wann Är Demande ausgewielt gëtt, da gesäit d’Astellungsprozedur am Prinzip zwee Gespréicher a verschidden Astellungstester fir. Déi ofschléissend Entscheedung hëlt d’Commission de recrutement. Mir deelen Iech dës Entscheedung esou séier ewéi méiglech mat.
-
Kann ech eng spontan Demande un d’Spuerkeess schécken?
Natierlech, mir studéieren opmierksam Är spontan Demanden. Mir roden Iech awer, fir regelméisseg eis oppe Plazen op dëser Internetsäit ze kucken an op dës oppe Plazen ze postuléieren.
-
Wéini ass de beschte Moment, fir meng Demande ofzeschécken?
D’Spuerkeess stellt lafend nei Mataarbechter an. Dohir kënnt Dir zu all Moment postuléieren.